هساره واران

رووژێ وه یه‌ک ره‌سیم له یه‌ێ واران له یه‌ێ ئێواران له یه‌ێ چه‌و نؤقانن و چه‌و پرتانن، رووژێ وه یه‌ک ره‌سیم له سنووڕێگ دۊر و قاچاخی، تو ماچ م که‌ید و منیش ده‌س تو وه گه‌رمی جه‌ڕه‌و ده‌م ... رووژێ وه یه‌ک ره‌سیم له ناو وه‌ره‌ق کۊیه‌نه‌ێ شێعره‌گان باپیری ...
شێعر هاوڕێ رووژه‌یل ته‌نیایی منه، ته‌نیا ده‌رفه‌ت ژیان، ته‌نیا دڵخوه‌شی هه‌ناس کیشان، م پێا بۊمه له ناوڕاس شێعره‌گان په‌شێو هاڵ پائیزییم، له رووژ باێه ژیان کرد، له رووژ باێه رێ کرد، له رووژ باێه عاشق بۊ و له رووژ باێه وه یه‌ک ره‌سی؟!
ئێ کتاوه کوورپه مناڵ سه‌ره‌تاتگی که‌ر و گامووله‌کی ره‌و ده‌رفه‌ته‌یل له هۊره‌و چێ زوان داڵگی من و عاشقه‌یل بێ وێنه‌ێ وڵاتمه‌سه ک وه یارمه‌تی فره له هاوڕێانم کوو بۊیه و له رووژێگ پائیزی گه‌رماێ له‌ش روونج کردێیمه، هه‌رچه‌ن ته‌جرووه‌ێگه له تۊیه‌نس و نه‌تۊیه‌نسن له شێعرێگ بوومی وه وه‌تنێگ جه‌هانی هێمان وه وشه‌یل و ره‌وشه‌یل دۊر سه‌رده‌م ئێ زوانه پابه‌سیم، ئه‌وانه‌ێ ک پا وه گه‌زدان، ئه‌ڕا شه‌که‌تی ده‌ر کردن، رووژێگ باێه بیلن و بچن، وه‌ڵێگ م خوه‌م تاڵ وه‌رین زڵف یار و ده‌روه‌چ تماشاێ له دۊره‌و نووڕسن زانم ...
وه ئمێد رووژه‌یل نوو ئه‌ڕاێ ئێ شێوه‌زار نۊسانه، وه ئمێد به‌ێداخ داری ئاڵاێ به‌رز و ره‌نگین سه‌رزه‌مینم، شێعره‌گانم پێشکه‌ش که‌م وه سواره‌یل رێ ئازادی و بێ په‌رده نۊسان، پێشکه‌شێ که‌م وه داڵگێ گ هه‌م شێره‌ژن بۊ و هه‌م گه‌ورا پیا ...

موعین شاهوه‌یسی / کرماشان